gurudēvatā bhajanamaṃjarī

kīrtanam — 13

atibhāratimativibhavān
jitatīrthānāśritāghanirharaṇē |
dharaṇērdēśikacharaṇān
śaraṇaṃ karavāṇi bhāratītīrthān ||

samuchitatamanāmānaḥ
śrīcharaṇā bhāṃti bhāratītīrthāḥ |
paramā guravō guravaḥ
prīṇaṃtyē tēṣu pūjitēṣu param ||

ānaṃdē khalu varṣē
jagatāmānaṃdabṛṃdasaṃdātrī |
āśramacharyā turyā bhuvanāchāryān
samāśritā varyān ||

maṃdasmitābhirāmaṃ
maṃdētarakāṃti bhūyasā tapasā |
sadayāpāṃgaṃ dēśikavadanaṃ
dhyāyāmi bhūṣitaṃ bhūtyā ||

maṃjulapadavinyāsaṃ
manōharībhūtagūḍhaśāstrārtham |
dharmaprachārachaturaṃ
śarmadamāchāryabhāṣaṇaṃ jayati ||

rudrākṣabhūṣitāyatavakṣassthala­śōbhichārukāṣāyam |
dōṣōjjhitabhāṣāchayaviduṣāṃ
vapurastu śāṃtayē'mīṣām ||

taruṇāruṇasarasīruhacharaṇānāṃ
dēśikēṃdracharaṇānām |
kāmayatē mama mānasa­mānatanṛpamauli pādapīṭhatvam ||

vaiduṣyaṃ rasikatvaṃ vāgmitvaṃ
vistṛtaṃ vadānyatvam |
prītirbhōgaviraktissarvāṇyētāni
bhāratīguruṣu ||

karadhṛtachinmudraṃ varajapamālaṃ
haṃsasēvitaṃ tējaḥ |
brahmaṇi saktaṃ kiṃchana
mōhatamō haṃtu bhāratī nāmnā ||

niṣkāsayitumanaṃgaṃ
lakṣmītanayaṃ tamādyarasahētum |
navamarasaikādhārān
lakṣmītanayān gurūn bhajē sarvān ||

sumadhuravādyaninādaṃ
sapulakabhaktaughaparivṛtaṃ tēṣām |
āsthānīṃ prati gamanaṃ
smaraṇē smaraṇē dadāti mē mōdam ||

hīrakirīṭān prāvṛtahaimakṣaumān
gurūn vibhūṣāḍhyān |
yāchē hastālaṃbanamālaṃbita­bhaktavaryapāṇitalān ||

vaṃdijanē stutimukharē
vaṃdāruṣvadhikṛtēṣu puruṣēṣu |
vādyachayē kalaninadē
vibhāṃti siṃhāsanē gurūttaṃsāḥ ||

rachitā bhuvanagurūṇāmuchitā
vasatissthaladvayē niyatā |
śṛṃgē mahīdharēṃdrē
samakāṭhinyē madaṃtaraṃgē cha ||