jagadguru śaṃkarāchārya guru mahārāja kī jai |
mudā karēṇa pustakaṃ
dadhānamīśarūpiṇaṃ
tathā'parēṇa mudrikāṃ
namattamōvināśinīm |
kusuṃbhavāsasāvṛtaṃ
vibhūtibhāsiphālakaṃ
natāghanāśanē rataṃ namāmi śaṃkaraṃ gurum ||
parāśarātmajapriyaṃ
pavitritakṣamātalaṃ
purāṇasāravēdinaṃ
sanaṃdanādisēvitam |
prasannavaktrapaṃkajaṃ
prapannalōkarakṣakam
prakāśitādvitīyatattvamāśrayāmi dēśikam ||
sudhāṃśuśēkharārchakaṃ
sudhīṃdrasēvyapādukaṃ
sutādimōhanāśakaṃ
suśāṃtidāṃtidāyakam |
samastavēdapāragaṃ
sahasrasūryabhāsuraṃ
samāhitākhilēṃdriyaṃ
sadā bhajāmi śaṃkaram ||
yamīṃdrachakravartinaṃ
yamādiyōgavēdinaṃ
yathārthatattvabōdhakaṃ
yamāṃtakātmajārchakam |
yamēva muktikāṃkṣayā
samāśrayaṃti sajjanā-
namāmyahaṃ sadā guruṃ
tamēva śaṃkarābhidham ||
svabālya ēva nirbharaṃ
ya ātmanō dayālutāṃ
daridravipramaṃdirē
suvarṇavṛṣṭimānayan |
pradarśya vismayāṃbudhau
nyamajjayat samānjanān
sa ēva śaṃkarassadā
jagadgururgatirmama ||
yadīyapuṇyajanmanā
prasiddhimāpa kālaṭī
yadīyaśiṣyatāṃ vrajan
sa tōṭakō'pi paprathē |
ya ēva sarvadēhināṃ
vimuktimārgadarśakō-
narākṛtiṃ sadāśivaṃ
tamāśrayāmi sadgurum ||
sanātanasya vartmanaḥ
sadaiva pālanāya yaḥ
chaturdiśāsu sanmaṭhān
chakāra lōkaviśrutān |
vibhāṃḍakātmajāśramādisusthalēṣu pāvanān
tamēva lōkaśaṃkaraṃ
namāmi śaṃkaraṃ gurum ||
yadīyahastavārijātasupratiṣṭhitā satī
prasiddhaśṛṃgabhūdharē
sadā praśāṃtibhāsurē |
svabhaktapālanavratā
virājatē hi śāradā
sa śaṃkaraḥ kṛpānidhiḥ
karōtu māmanēnasam ||
imaṃ stavaṃ jagadgurōrguṇānuvarṇanātmakaṃ
samādarēṇa yaḥ paṭhēdananyabhaktisaṃyutaḥ |
samāpnuyāt samīhitaṃ
manōrathaṃ narō'chirāt
dayānidhēssa śaṃkarasya
sadgurōḥ prasādataḥ ||
jagadguru śaṃkarāchārya guru mahārāja kī jai |