bhaja gōviṃdaṃ bhaja gōviṃdaṃ
gōviṃdaṃ bhaja mūḍhamatē |
saṃprāptē sannihitē kālē
na hi na hi rakṣati ḍukṛñkaraṇē ||
mūḍha jahīhi dhanāgamatṛṣṇāṃ
kuru sadbuddhiṃ manasi vitṛṣṇām |
yallabhasē nijakarmōpāttaṃ
vittaṃ tēna vinōdaya chittam ||
nārīstanabharanābhīdēśaṃ
dṛṣṭvā mā gā mōhāvēśam |
ētanmāṃsavasādivikāraṃ
manasi vichiṃtaya vāraṃvāram ||
nalinīdalagatajalamatitaralaṃ
tadvajjīvitamatiśayachapalam |
viddhi vyādhyabhimānagrastaṃ
lōkaṃ śōkahataṃ cha samastam ||
yāvadvittō'pārjanasakta-
stāvannijaparivārō raktaḥ |
paśchājjīvati jarjaradēhē
vārttāṃ kō'pi na pṛchchhati gēhē ||
yāvatpavanō nivasati dēhē
tāvatpṛchchhati kuśalaṃ gēhē |
gatavati vāyau dēhāpāyē
bhāryā bibhyati tasminkāyē ||
bālastāvatkrīḍāsakta-
staruṇastāvattaruṇīsaktaḥ |
vṛddhastāvachchiṃtāsaktaḥ
paramē brahmaṇi kō'pi na saktaḥ ||
kā tē kāṃtā kastē putraḥ
saṃsārō'yamatīva vichitraḥ |
kasya tvaṃ kaḥ kuta āyāta-
stattvaṃ chiṃtaya yadidaṃ bhrātaḥ ||
satsaṃgatvē niḥsaṃgatvaṃ
niḥsaṃgatvē nirmōhatvam |
nirmōhatvē niśchalitattvaṃ
niśchalitattvē jīvanmuktiḥ ||
vayasi gatē kaḥ kāmavikāraḥ
śuṣkē nīrē kaḥ kāsāraḥ |
kṣīṇē vittē kaḥ parivārō
jñātē tattvē kaḥ saṃsāraḥ ||
mā kuru dhanajanayauvanagarvaṃ
harati nimēṣātkālaḥ sarvam |
māyāmayamidamakhilaṃ hitvā
brahmapadaṃ tvaṃ praviśa viditvā ||
dinayāminyau sāyaṃ prātaḥ
śiśiravasaṃtau punarāyātaḥ |
kālaḥ krīḍati gachchhatyāyu-
stadapi na muṃchatyāśāvāyuḥ ||
kā tē kāṃtādhanagatachiṃtā
vātula kiṃ tava nāsti niyaṃtā |
trijagati sajjanasaṃgatirēkā
bhavati bhavārṇavataraṇē naukā ||
jaṭilō muṃḍī luṃchitakēśaḥ
kāṣāyāṃbarabahukṛtavēṣaḥ |
paśyannapi cha na paśyati mūḍhō
hyudaranimittaṃ bahukṛtavēṣaḥ ||
aṃgaṃ galitaṃ palitaṃ muṃḍaṃ
daśanavihīnaṃ jātaṃ tuṃḍam |
vṛddhō yāti gṛhītvā daṃḍaṃ
tadapi na muṃchatyāśāpiṃḍam ||
agrē vahniḥ pṛṣṭhē bhānū
rātrau chubukasamarpitajānuḥ |
karatalabhikṣastarutalavāsa
stadapi na muṃchatyāśāpāśaḥ ||
kurutē gaṃgāsāgaragamanaṃ
vrataparipālanamathavā dānam |
jñānavihīnaḥ sarvamatēna
muktiṃ na bhajati janmaśatēna ||
suramaṃdiratarumūlanivāsaḥ
śayyā bhūtalamajinaṃ vāsaḥ |
sarvaparigrahabhōgatyāgaḥ
kasya sukhaṃ na karōti virāgaḥ ||
yōgaratō vā bhōgaratō vā
saṃgaratō vā saṃgavihīnaḥ |
yasya brahmaṇi ramatē chittaṃ
naṃdati naṃdati naṃdatyēva ||
bhagavadgītā kiṃchidadhītā
gaṃgājalalavakaṇikā pītā |
sakṛdapi yēna murārisamarchā
kriyatē tasya yamēna na charchā ||
punarapi jananaṃ punarapi maraṇaṃ
punarapi jananījaṭharē śayanam |
iha saṃsārē bahudustārē
kṛpayāpārē pāhi murārē ||
rathyākarpaṭavirachitakaṃthaḥ
puṇyāpuṇyavivarjitapaṃthaḥ |
yōgī yōganiyōjitachittō
ramatē bālōnmattavadēva ||
kastvaṃ kō'haṃ kuta āyātaḥ
kā mē jananī kō mē tātaḥ |
iti paribhāvaya sarvamasāraṃ
viśvaṃ tyaktvā svapnavichāraṃ ||
tvayi mayi chānyatraikō viṣṇu-
rvyarthaṃ kupyasi mayyasahiṣṇuḥ |
sarvasminnapi paśyātmānaṃ
sarvatrōtsṛja bhēdajñānam ||
śatrau mitrē putrē baṃdhau
mā kuru yatnaṃ vigrahasaṃdhau |
bhava samachittaḥ sarvatra tvaṃ
vāṃchhasyachirādyadi viṣṇutvam ||
kāmaṃ krōdhaṃ lōbhaṃ mōhaṃ
tyaktvātmānaṃ bhāvaya kō'ham |
ātmajñānavihīnā mūḍhā-
stē pachyaṃtē narakanigūḍhāḥ ||
gēyaṃ gītānāmasahasraṃ
dhyēyaṃ śrīpatirūpamajasram |
nēyaṃ sajjanasaṃgē chittaṃ
dēyaṃ dīnajanāya cha vittam ||
sukhataḥ kriyatē rāmābhōgaḥ
paśchāddhaṃta śarīrē rōgaḥ |
yadyapi lōkē maraṇaṃ śaraṇaṃ
tadapi na muṃchati pāpācharaṇam ||
arthamanarthaṃ bhāvaya nityaṃ
nāsti tataḥ sukhalēśaḥ satyam |
putrādapi dhanabhājāṃ bhītiḥ
sarvatraiṣā vihitā rītiḥ ||
prāṇāyāmaṃ pratyāhāraṃ
nityānityavivēkavichāram |
jāpyasamētasamādhividhānaṃ
kurvavadhānaṃ mahadavadhānam ||
gurucharaṇāṃbujanirbharabhaktaḥ
saṃsārādachirādbhava muktaḥ |
sēṃdriyamānasaniyamādēvaṃ
drakṣyasi nijahṛdayasthaṃ dēvam ||