గురుదేవతా భజనమంజరీ

శుక్లాంబరధరం విష్ణుం
శశివర్ణం చతుర్భుజమ్ |
ప్రసన్నవదనం ధ్యాయేత్
సర్వవిఘ్నోపశాంతయే ||

మాలా-సుధా-కుంభ-విబోధముద్రా-
విద్యావిరాజత్కరవారిజాతామ్ |
అపారకారుణ్య సుధాంబురాశిం
శ్రీశారదాంబాం ప్రణతోఽస్మి నిత్యమ్ ||

సదాశివ సమారంభాం
శంకరాచార్య మధ్యమామ్ |
అస్మదాచార్య పర్యంతాం
వందే గురుపరంపరామ్ ||

గురుర్బ్రహ్మా గురుర్విష్ణుః
గురుర్దేవో మహేశ్వరః |
గురుస్సాక్షాత్‌ పరంబ్రహ్మ
తస్మై శ్రీగురవే నమః ||

శ్రుతిస్మృతిపురాణానామాలయం
కరుణాలయమ్ |
నమామి భగవత్పాదశంకరం
లోకశంకరమ్ ||

అవతీర్ణశ్చ కాలట్యాం
కేదారేంతర్హితశ్చ యః |
చతుష్పీఠప్రతిష్ఠాతా
జయతాచ్ఛంకరో గురుః ||

శివం శివకరం శాంతం
శివాత్మానం శివోత్తమమ్ |
శివమార్గ ప్రణేతారం
ప్రణతోస్మి సదాశివమ్ ||

శివాయ విష్ణురూపాయ
శివరూపాయ విష్ణవే |
శివస్య హృదయం విష్ణుర్
విష్ణోశ్చ హృదయం శివః ||

సర్వమంగలమాగల్యే
శివే సర్వార్థసాధికే |
శరణ్యే త్ర్యంబకే గౌరి
నారాయణి నమోఽస్తు తే ||

ప్రహ్లాద నారద పరాశర పుండరీక
వ్యాసాంబరీష శుక శౌనక భీష్మదాల్భ్యాన్ |
రుక్మాంగదార్జున వసిష్ఠ విభీషణాదీన్
ధన్యానిమాన్ పరమభాగవతాన్ స్మరామి ||

హరేర్నామైవ నామైవ
నామైవ మమ జీవనమ్ |
కలౌ నాస్త్యేవ నాస్త్యేవ
నాస్త్యేవ గతిరన్యథా ||

కాలక్షేపో న కర్తవ్యః
క్షీణమాయుః క్షణే క్షణే
యమస్య కరుణానాస్తి
కర్తవ్యం హరికీర్తనమ్ ||

నాహం వసామి వైకుంఠే
యోగినాం హృదయే న చ |
మద్భక్తా యత్ర గాయంతి
తత్ర తిష్ఠామి నారద ||

వాత్సల్యాదభయప్రదానసమయా­దార్తార్తినిర్వాపణాత్
ఔదార్యాదఘశోషణాదగణిత­శ్రేయఃపదప్రాపణాత్ |
సేవ్యః శ్రీపతిరేక ఏవ జగతాం
సంత్యత్ర షట్సాక్షిణః
ప్రహ్లాదశ్చ విభీషణశ్చ కరిరాట్
పాంచాల్యహల్యా ధ్రువః ||

వైదేహీ సహితం సురద్రుమతలే
హైమే మహామండపే
మధ్యే పుష్పకమాసనే మణిమయే
వీరాసనే సుస్థితమ్ |
అగ్రే వాచయతి ప్రభంజనసుతే
తత్త్వం మునిభ్యః పరం
వ్యాఖ్యాంతం భరతాదిభిః పరివృతం
రామం భజే శ్యామలమ్ ||

యత్ర యత్ర రఘునాథ కీర్తనం
తత్ర తత్ర కృతమస్తకాంజలిమ్ |
బాష్పవారి పరిపూర్ణ లోచనం
మారుతిం నమత రాక్షసాంతకమ్ ||