జగద్గురు శంకరాచార్య గురు మహారాజ కీ జై |
ముదా కరేణ పుస్తకం
దధానమీశరూపిణం
తథాఽపరేణ ముద్రికాం
నమత్తమోవినాశినీమ్ |
కుసుంభవాససావృతం
విభూతిభాసిఫాలకం
నతాఘనాశనే రతం నమామి శంకరం గురుమ్ ||
పరాశరాత్మజప్రియం
పవిత్రితక్షమాతలం
పురాణసారవేదినం
సనందనాదిసేవితమ్ |
ప్రసన్నవక్త్రపంకజం
ప్రపన్నలోకరక్షకమ్
ప్రకాశితాద్వితీయతత్త్వమాశ్రయామి దేశికమ్ ||
సుధాంశుశేఖరార్చకం
సుధీంద్రసేవ్యపాదుకం
సుతాదిమోహనాశకం
సుశాంతిదాంతిదాయకమ్ |
సమస్తవేదపారగం
సహస్రసూర్యభాసురం
సమాహితాఖిలేంద్రియం
సదా భజామి శంకరమ్ ||
యమీంద్రచక్రవర్తినం
యమాదియోగవేదినం
యథార్థతత్త్వబోధకం
యమాంతకాత్మజార్చకమ్ |
యమేవ ముక్తికాంక్షయా
సమాశ్రయంతి సజ్జనా-
నమామ్యహం సదా గురుం
తమేవ శంకరాభిధమ్ ||
స్వబాల్య ఏవ నిర్భరం
య ఆత్మనో దయాలుతాం
దరిద్రవిప్రమందిరే
సువర్ణవృష్టిమానయన్ |
ప్రదర్శ్య విస్మయాంబుధౌ
న్యమజ్జయత్ సమాన్‍జనాన్
స ఏవ శంకరస్సదా
జగద్గురుర్గతిర్మమ ||
యదీయపుణ్యజన్మనా
ప్రసిద్ధిమాప కాలటీ
యదీయశిష్యతాం వ్రజన్
స తోటకోఽపి పప్రథే |
య ఏవ సర్వదేహినాం
విముక్తిమార్గదర్శకో-
నరాకృతిం సదాశివం
తమాశ్రయామి సద్గురుమ్ ||
సనాతనస్య వర్త్మనః
సదైవ పాలనాయ యః
చతుర్దిశాసు సన్మఠాన్
చకార లోకవిశ్రుతాన్ |
విభాండకాత్మజాశ్రమాదిసుస్థలేషు పావనాన్
తమేవ లోకశంకరం
నమామి శంకరం గురుమ్ ||
యదీయహస్తవారిజాతసుప్రతిష్ఠితా సతీ
ప్రసిద్ధశృంగభూధరే
సదా ప్రశాంతిభాసురే |
స్వభక్తపాలనవ్రతా
విరాజతే హి శారదా
స శంకరః కృపానిధిః
కరోతు మామనేనసమ్ ||
ఇమం స్తవం జగద్గురోర్గుణానువర్ణనాత్మకం
సమాదరేణ యః పఠేదనన్యభక్తిసంయుతః |
సమాప్నుయాత్ సమీహితం
మనోరథం నరోఽచిరాత్
దయానిధేస్స శంకరస్య
సద్గురోః ప్రసాదతః ||
జగద్గురు శంకరాచార్య గురు మహారాజ కీ జై |