గురుదేవతా భజనమంజరీ

యశ్శివో నామరూపాభ్యాం
యా దేవీ సర్వమంగలా |
తయోస్సంస్మరణాత్ పుంసాం
సర్వతో జయ మంగలమ్ ||

విద్యాముద్రాక్షమాలాఽమృతకలశకరా
కోటిసూర్యప్రకాశా
జాయా పద్మోద్భవస్య ప్రణతజనతతేః
సర్వమిష్టం దిశంతీ |
ఇంద్రోపేంద్రాదివంద్యా త్రిభువనజననీ
వాక్సవిత్రీ శరణ్యా
సేయం శ్రీశారదాంబా సకలసుఖకరీ
మంగలాని ప్రదద్యాత్ ||

ఓమితి ప్రతిపాద్యాయ
బ్రహ్మణే గురుమూర్తయే |
శంకరాచార్యరూపాయ
పరమేశాయ మంగలమ్ ||

బ్రహ్మసూత్రోపనిషదాం
భాష్యకర్తేఽఖిలాత్మనే |
సర్వజ్ఞాయ శివాయాస్తు
మంగలం మంగలాత్మనే ||

మంగలం మస్కరీంద్రాయ
మహనీయ గుణాత్మనే |
శారదాపీఠసర్వస్వ
సార్వభౌమాయ మంగలమ్ ||

శ్రీరామచంద్రః శ్రితపారిజాతః
సమస్త కల్యాణ గుణాభిరామః ।
సీతాముఖాంభోరుహ చంచరీకః
నిరంతరం మంగలమాతనోతు ॥

అనన్యాశ్చింతయంతో మాం
యే జనాః పర్యుపాసతే |
తేషాం నిత్యాభియుక్తానాం
యోగక్షేమం వహామ్యహమ్ ||

సర్వదా సర్వకార్యేషు
నాస్తి తేషామమంగలమ్ |
యేషాం హృదిస్థో భగవాన్
మంగలాయతనం హరిః ||

లాభస్తేషాం జయస్తేషాం
కుతస్తేషాం పరాభవః |
యేషామిందీవరశ్యామో
హృదయస్థో జనార్దనః ||

రాజాధిరాజవేషాయ
రాజత్-కోదండబాహవే |
రాజీవచారునేత్రాయ
రామభద్రాయ మంగలమ్ ||

ప్రహ్లాదస్తుతిసంతుష్ట­ప్రసన్ననిజమూర్తయే |
వరదాభయహస్తాయ
వరదాయ చ మంగలమ్ ||

ఉల్లంఘ్య సింధోః సలిలం సలీలం
యః శోకవహ్నిం జనకాత్మజాయాః |
ఆదాయ తేనైవ దదాహ లంకాం
నమామి తం ప్రాంజలిరాంజనేయమ్ ||

కాంచనాద్రినిభాంగాయ
వాంఛితార్థప్రదాయినే |
అంజనాభాగ్యరూపాయ
ఆంజనేయాయ మంగలమ్ ||

కాయేన వాచా మనసేంద్రియైర్వా
బుద్ధ్యాత్మనా వా ప్రకృతేః స్వభావాత్ |
కరోమి యద్యత్ సకలం పరస్మై
నారాయణాయేతి సమర్పయామి ||

కరచరణకృతం వా­క్కాయజం కర్మజం వా
శ్రవణనయనజం వా
మానసం వాపరాధమ్ |
విదితమవిదితం వా
సర్వమేతత్క్షమస్వ
జయ జయ కరుణాబ్ధే
శ్రీమహాదేవ శంభో ||

సర్వేషు దేశేషు యథేష్టవృష్టిః
సంపూర్ణసస్యా చ మహీ చకాస్తు ।
సర్వే జనాస్సంతు సుఖేన యుక్తాః
స్వస్వేషు ధర్మేషు రతాశ్చ నిత్యమ్ ॥

శారదే పాహి మాం
శంకర రక్షమామ్ |
శారదే పాహి మాం
శంకర రక్షమామ్ ||