ಗುರುದೇವತಾ ಭಜನಮಂಜರೀ

ಶಂಕಾರೂಪೇಣ ಮಚ್ಚಿತ್ತಂ
ಪಂಕೀಕೃತಮಭೂದ್ಯಯಾ |
ಕಿಂಕರೀ ಯಸ್ಯ ಸಾ ಮಾಯಾ ಶಂಕರಾಚಾರ್ಯಮಾಶ್ರಯೇ ||1||

ಪ್ರಹ್ಲಾದವರದೋ ದೇವೋ
ಯೋ ನೃಸಿಂಹಃ ಪರೋ ಹರಿಃ |
ನೃಸಿಂಹೋಪಾಸಕಂ ನಿತ್ಯಂ
ತಂ ನೃಸಿಂಹಗುರುಂ ಭಜೇ ||2||

ಶ್ರೀಸಚ್ಚಿದಾನಂದ ಶಿವಾಭಿನವ್ಯ­ನೃಸಿಂಹಭಾರತ್ಯಭಿಧಾನ್ ಯತೀಂದ್ರಾನ್ |
ವಿದ್ಯಾನಿಧೀನ್ ಮಂತ್ರನಿಧೀನ್
ಸದಾತ್ಮನಿಷ್ಠಾನ್ ಭಜೇ ಮಾನವಶಂಭುರೂಪಾನ್ ||3||

ಸದಾತ್ಮಧ್ಯಾನನಿರತಂ
ವಿಷಯೇಭ್ಯಃ ಪರಾಙ್ಮುಖಮ್ |
ನೌಮಿ ಶಾಸ್ತ್ರೇಷು ನಿಷ್ಣಾತಂ
ಚಂದ್ರಶೇಖರಭಾರತೀಮ್ ||4||

ವಿವೇಕಿನಂ ಮಹಾಪ್ರಜ್ಞಂ
ಧೈರ್ಯೌದಾರ್ಯಕ್ಷಮಾನಿಧಿಮ್ |
ಸದಾಭಿನವಪೂರ್ವಂ ತಂ
ವಿದ್ಯಾತೀರ್ಥಗುರುಂ ಭಜೇ ||5||

ಅಜ್ಞಾನಾಂ ಜಾಹ್ನವೀತೀರ್ಥಂ
ವಿದ್ಯಾತೀರ್ಥಂ ವಿವೇಕಿನಾಮ್ |
ಸರ್ವೇಷಾಂ ಸುಖದಂ ತೀರ್ಥಂ
ಭಾರತೀತೀರ್ಥಮಾಶ್ರಯೇ ||6||

ವಿದ್ಯಾವಿನಯಸಂಪನ್ನಂ
ವೀತರಾಗಂ ವಿವೇಕಿನಮ್ |
ವಂದೇ ವೇದಾಂತತತ್ತ್ವಜ್ಞಂ
ವಿಧುಶೇಖರಭಾರತೀಮ್ ||7||