विघ्नेश्वर भगवान की जै | विद्या गणपती की जै |
मुदाकरात्तमोदकं सदा विमुक्तिसाधकं
कलाधरावतंसकं विलासलोकरक्षकम् |
अनायकैकनायकं विनाशितेभदैत्यकं
नताशुभाशुनाशकं नमामि तं विनायकम् ||
नतेतरातिभीकरं नवोदितार्कभास्वरं
नमत्सुरारिनिर्जरं नताधिकापदुद्धरम् |
सुरेश्वरं निधीश्वरं गजेश्वरं गणेश्वरं
महेश्वरं तमाश्रये परात्परं निरंतरम् ||
समस्तलोकशंकरं निरस्तदैत्यकुंजरं
दरेतरोदरं वरं वरेभवक्त्रमक्षरम् |
कृपाकरं क्षमाकरं मुदाकरं यशस्करं
मनस्करं नमस्कृतां नमस्करोमि भास्वरम् ||
अकिंचनार्तिमार्जनं चिरंतनोक्तिभाजनं
पुरारिपूर्वनंदनं सुरारिगर्वचर्वणम् |
प्रपंचनाशभीषणं धनंजयादिभूषणं
कपोलदानवारणं भजे पुराणवारणम् ||
नितांतकांतदंतकांतिमंतकांतकात्मजं
अचिंत्यरूपमंतहीनमंतरायकृंतनम् |
हृदंतरे निरंतरं वसंतमेव योगिनां
तमेकदंतमेकमेव चिंतयामि संततम् ||
महागणेशपंचरत्नमादरेण योन्वहं
प्रजल्पति प्रभातके हृदि स्मरन् गणेश्वरम् |
अरोगतामदोषतां सुसाहितीं सुपुत्रतां
समीहितायुरष्टभूतिमभ्युपैति सोऽचिरात् ||
विघ्नेश्वर भगवान की जै | विद्या गणपती की जै |